Ang Babae ang manligaw - Nick Ferarin

ANG BABAE ANG MANLIGAW Nick Ferarin Napaisip ng malalim kung babae ang manligaw Magsisibak nitong kahoy, sinaunang panliligaw Mag-iigib din ng tubig, maskulado itong galaw Hindi yata p'wede ito sa paghaplos t'yak aayaw. Ngunit sa bagong panahon, tila yata maaari Pagkat lalaki ay torpe lalo't basal ang ugali Sa babaeng minumutya ang loob ay minimithi Na magtapat na totoo sa sinta n'yang tinatangi. Kaya ito'y nararapat, sa babae kung lumiyag Ito ay pagkakataon, ang damdamin ay ihayag Kung lalaki'y naging t'yope, hindi alam nararapat Kahit na nga sa simula, mangangapa, ito'y tiyak. Kaya dapat ng sabihin ang nilaman nitong puso Sa lalaking nakikimi na wikain ang pagsuyo Tingin naman di masama kung magsabi ng totoo Wala naman mababawas sa kaniyang pagkatao. Ang tradisyong sinauna, hindi nababagay ngayon Dati-rati ay kalesa sa kalsada gumugulong Tagahila ay kabayo ang pamalo ay sinturon Ngunit ngayon ay iba na may makina itong gulong. Malayo na ang narating nitong agham at pag-ibig Ang lahat ay nagbabago bawat minuto at saglit Itong ating kinagisnan kasaysayan mauulit Ngunit iba ang pamagat, babae ang mamimilit. Bakit hindi ka papayag na babae ang manligaw Kung ito nga 'y napanahon siya itong mag-aalay Bulaklak at tsokolate sa lalaki ibibigay Hindi naman 'to masagwa kung tunay ang pagmamahal. Baka naman nanaghili dahil hindi mo dinanas Ang mabigyan ng regalo na nagmula sa niliyag Kung marapat ay mabuti ito'y kanyang ihahatag Sa binata na natorpe, sa inirog na minahal. Hindi naman asal hayop kung babae ay umibig Hinamak lang itong lahat makamit lang ang nilangit Dahil torpe ang lalaki karanasan ay nawaglit Hindi mo nga masisisi kung pag-ibig ay igiit. Marami d'yan pangyayari na nabihag itong puso Ang babae ang nanligaw simple lamang ito'y tago Hindi nga lang binubunyag dahil hiyang marahuyo Sa lalaking nililiyag hindi ito gawang biro. Ang totoo, naranasan, ko nga itong pahiwatig Nang dalaga na may gusto ang mata ay naka titig At napansin ang pagsulyap binibining sakdal tamis Kaya ako ay lumapit binigyan pa ng tsokoleyt. Iyon na nga ang simula at nagtagpo itong puso Dahil walang karanasan sa larangan ng pagsuyo Siya itong lumalapit at ako nga ang sinuyo Kaya nga di nalaunan, sinakal nga walang kibo .