How to Earn Money on Youtube 2020 | Step by Step Guide

Bedtime Drink For Weight Loss | Lose 3Kg In a Week | Bedtime Smoothie Fo...

araw ng linggo ni jez rico cuenta

ARAW NG LINGGO
ni Jez Rico Cuenta

Linggo ng umaga
nang ika'y sumilay
Akala ko noo'y
anghel ka sa buhay
Sa puti mong suot
marilag mong taglay
Ang mahikang kusang pumawi ng lumbay

Pinuyos mong buhok
at matang marikit
Sa pagtitig sa'yo
ayaw nang pumikit
Nang ika'y mapansing
sa aki'y palapit
Aba't itong dibdib ay muntik mapunit

Anghel kang 'di anghel
nang aking tadhana
Ginulo mong puso
nang abang makata
At yaman din lamang
na sa'yo humanga
Alay ko ay tulang hinabi ng diwa

Pagsapit ng gabi
kung ika'y hihiga
Silipin mo muna
yaong langit sinta
Sa tanglaw ng buwan
ay magugunita
May isang binatang sa'yo may pagsinta

Ang Aking Pangarap ni Efren Valte

Ang kaakuhan ko'y di mo malilimot dahil ako'y bantay sa iyo ay tanod, nakatayo ako sa harap ng Diyos nguni't ang malay ko'y laging nakaluhod. Tagasibol ako ng iyong pag-asa at tagapagtanggol sa oras ng sigwa, kita'y binubuhat gabi ma't umaga upang ang sikmura'y aking maisalba. Ang mga biyaya'y oo nga't laganap nasusumpungan lang ng mga masipag subalit malaya kahit mga tamad na sa magsasaka ay makikiangkas. Saan mang lupalop sa sulok ng mundo iisa ang nasa ng lahat ng tao, unahing mabuhay,lumayang totoo sa karalitaan ay maipanalo. Tunay ngang kay yaman ng dibdib ng lupa tila ba kawangis ng inang nagpala sa kanyang kandili ay pinasagana ang daloy ng buhay na malahimala. Masayan mang tignan nguni't lumuluha sa taghoy at daing ay nag-aadhika; ang aking sagisag gulugod ng bansa akong tagaligtas ang siyang kawawa. Ako'y sumisigaw,hindi napupuot sa mga nilalang na animo'y dios sa pagod ng iba'y siyang sumasahod nagsasamantala sa sistemang bulok! Tanod na bayani,sino ang tututol kung ako'y nahimbing kaya ka nagutom hindi ba ako rin ang siyang nag-ahon sa dakong Kanluran ng magkaresesyon? Nangangarap akong maging isang butil ng isang halamang sa init magising sa kapanahunan,nais ko'y mapansin sa aking pagtubo'y merong Magigising! Ang Aking Pangarap 03/01/16 edv

BALIK PAGKABATA -Nick Ferarin

BALIK PAGKABATA Nick Ferarin Bakit itong mundo ay sadyang magulo? Hindi magkasundo, itong bawat tao Lagi lang magaling, ang bawat panuto Walang umaamin, mahina ang ulo. Kapag nga nagtalo, namuo ang ngalit At ang bawat isa, katwira'y giniit Hindi natatalos, dapat ay pag-ibig Laging mananahan, sa puso at isip. Hindi ba huhupa ang galit sa puso? At palatandaan ng init ng ulo Lahat namang bagay ay may pagbabago Hayaan na lamang, makalampas ito. Ang mga katwiran, dapat na pakinggan Kung mali o tama ang mga tinuran Sapagkat ang isip, dapat n'yang malaman Pinakipaglaban, na kadahilanan. Atin ngang limiin ang mga salita Kung ito'y naayon, sa 'ting pang-unawa; At pakatimbangin ang bawat kataga Na namumutawi sa dilang mahaba. Kaya nararapat, tayo'y magmahalan Ating kalimutan ang mga bangayan Itong pagkabata, balik sa isipan Upang ating Diyos, mahal tayong tunay.

GILIW KO -Pulang Tinta

GILIW KO ni: Pulang Tinta Mula sa hukay na napakalalim ako ay bumangon sa pagkakalibing upang ikaw giliw, muli kong hanapin nang ipagpatuloy ang pag-ibig natin. Sa muling paghakbang nitong mga paa ako ay mapagod , di ka na makita aking babagtasin ang iyong alaala no'ng mga panahong tayo'y magkasama. Oh! nasaan ka na oh mahal kong giliw alay kong bulaklak puno na ng agiw handog kong pag-ibig ay di magmamaliw kahit pa magmukha akong isang baliw. Sakaling mainip sa'king paghihintay sa banig ng lungkot diwa'y iraratay aking pipikit matang nananamlay at sa panaginip ako ay hihimlay.

sawing pag-ibig ni Pulang Tinta

SAWING PAG-IBIG ni:Pulang Tinta Sa lilim ng aking nasawing pagsuyo pilit gagamutin ang sugatang puso Mundo ma'y gumuho sa iyong paglayo kahit nanghihina ay muling tatayo. Iniwan mong sugat, gagawing kalasag upang paglabanan hagupit ng bukas naiwang kahapo'y magsisilbing lunas sa sugat ng pusong sa iyo nagbuhat. Ako'y maglalakbay sa 'sang panaginip, upang bawat pait limutin nang pilit doo'y iwawaksi ang lahat ng sakit upang makangiti sa'king pagbabalik.